Þróun atvinnuleysis er mjög svo eftirtektarverð en nú hefur Vinnumálastofnun birt nýjar tölur fyrir júnímánuð. Við upphaf bankahrunsins snarfjölgaði körlum á atvinnuleysisskrá og mátti m.a. rekja það til þess að byggingarframkvæmdir stöðvuðust. Síðustu mánuði hefur körlum hins vegar fækkað á atvinnuleysisskrá en konum fjölgað. Þannig jókst atvinnuleysi meðal kvenna um 4,6% í júnímánuði á meðan það minnkaði um 8,1% meðal karla. Enn sem komið er eru þó hlutfallslega fleiri karlar en konur á atvinnuleysiskrá en bilið minnkar stöðugt og nú standa karlar í 8,6% en konur í 7,4%.

Vissulega ber að fagna því að körlum fækki á atvinnuleysisskrá og þakka má það aðgerðum ríkisstjórnarinnar, m.a. er varða mannaflsfrekar framkvæmdir og hækkun á endurgreiðslu virðisaukaskatts vegna vinnu á byggingarstað í 100%.

Vaxandi atvinnuleysi meðal kvenna er hins vegar áhyggjuefni. Konur eru mun líklegri en karlar til að vinna störf á vegum hins opinbera og þessar tölur gætu gefið vísbendingar um að uppsagnir í þeim geira færist í aukana. Það er ekki aðeins áhyggjuefni vegna kynjavinkilsins heldur einnig vegna þess að vegið er að grunnstoðum velferðarkerfisins.

Best væri að stöðva þá þróun hið fyrsta, enda furðuleg taktík að segja upp fólki og halda á sama tíma alvöruþrungna fundi tækifæri í atvinnuuppbyggingu. Haldi þróunin hins vegar áfram á þessari braut er full ástæða fyrir stjórnvöld að fara að huga að atvinnuaðgerðum sem miða ekki bara að hefðbundnum karlastéttum.