Heimsborgarinn fór í einn þann skemmtilegasta samkvæmisleik sem hann hefur prófað í fínu matarboði á Ströndum nýverið. Leikurinn var einfaldlega þannig að gengið var hringinn og hver og einn partígesta sagði hópnum frá einu atriði sem pirraði hann. Þetta finnst nöldurskjóðu eins og Heimsborgaranum frábær leikur og átti hann að sjálfsögðu erfitt með að velja hvað hann ætti að nefna, enda margt sem getur farið í taugarnar á siðferðispostula á borð við Heimsborgarann. Einna merkilegast þótti Heimsborgaranum að hann gat tekið undir allt sem fram kom við borðið, nema að erfiðara væri að opna undarennufernur en aðrar mjólkurfernur. Heimsborgarinn drekkur hvorki mjólk né undanrennu. Sjálfur minntist Heimsborgarinn á jeppa sem lagt er upp á gangstétt þannig að gangandi og hjólandi vegfarendur komast ekki leiðar sinnar, hvað þá hjólastólafólk eða fólk með barnavagna. Tóku veislugestir undir þetta þó að sumir vildu nú meina að það væri alveg jafnpirrandi að rekast á fólksbíla á gangstéttum.

Eftir pirringshringinn var síðan tekinn einn jákvæðnihringur, svona til að kolefnisjafna hitt fjörið. Heimsborgaranum þótti það gaman, en þó hvergi eins gaman og að fá að röfla.